بابلو نيرودا عطشان .. يا صبايا الشاعر الأكره هلال العيد نيكسون جاء الانتخابات كلمتين لمصر السيما جائزة نوبل سلام مربع الغربة جنوب لبنان موال فلسطيني الأوله بلدي أصل الحكاية شوبش طرزان يا حبايبنا عدى الهوي البتاع على حسب وداد الممنوعات صبر أيوب الخالق الناطق الأقوال الماسورة عشق الصبايا الهلوسة باحبك اطلع من نواره سلام للأرض الشربة العجيبة عم السيد تذكرة مسجون الطنبور الصمت فزورة الأخلاق رساله رقم 1 صرخة جيفارا انتظار الحاوي عيون الكلام
بابلو
نيرودا
شيلي البارود
حطي الوعود
والتعليلات
في المهملات
سفحوا الورود
من ع الخدود
والخضره
من قلب البنات
فين الأمان
جنب الغيلان
يا ملفقين
عصر التبات ؟
لا الجرح بات
ولا إتنسي
ولا التاريخ
والذكريات
سيدنا الحسين
اسبارتاكوس
الليندي
لوركا
عب رحيم
فلاح بلدنا اللي انشوى
قبل القيامه
في جحيم
سينا الطعينه المزمنه
ارنستو
جيفارا العظيم
خميس وبقري
والشفيع
أدهم
ومواله القديم
قطب الرجال اللي ابتلي
لما تلا الذكر الحكيم
عقد العقيق اللي اتبدر
من عهد سقراط الحكيم
زاد النهارده
وانتظم
بالدره والفص اليتيم
نيرودا
زمار الصباح
نيرودا
مزمار النسيم
صابحه الصبيه
" سانتياجو "
تشرب لبنها من غناك
اتروعوا العصافير
وهاجوا
لما نعيت البوم
نعاك
وانت الشهيد
ملو البراح
جراح تعود المجروحين
ساعتين تشاور
ع الجراح
ينشد ضهر المطعونين
تتمدد إيدهم ع السلاح
وبعزم ما في الموجوعين
تطعن في شريان الطاعون
تجهز
على الداء الدفين
الشمس تطلع بالصباح
ترمي الصباح
على كل الإبد
حاضنه البنادق والجراح
بإيد وعافقه الناي
بإيد
والشمس تطلع في النهار
فوق كل قصر
وكل بيد
والشمس تسقط
في الغروب
عن بابلوا نيرودا .. الشهيد
دواره بتعدي السنين
يا أرضنا
يا ام البنين
دواره بتعدي اللي فات
يا أرضنا يا ام البنات
كروب
حروب
محن شعوب
كلاب
عذاب
ضباب
غروب
بروق
رعود
شروق
صعود
نضال
سجال حرام
حلال
والعدل .. كان
في كل آن
هو القضية
والرهان
والارض عاشت من زمان مسرح لفرسان الميدان
سيدنا الحسين
اسبارتاكوس
جيفارا
لوركا
عب رحيم
نيرودا زمار الصباح
نيرودا
مزمار النسيم
عطشان
.. يا صبايا
عطشان يا صبايا
وانا عاشق .. ع السبيل
عطشان
والميه ف بلدي
على عكس ما يجري النيل
والنخل العالي مطاطي
والجذع الواطي
ذليل
والريح العاكس
كابس
والريح العاطي
بخيل
والنسمه اتعكر لونها
من هم الناس
يا خليل
عطشان والنيل في بلدي
والزرع اخضر
وجميل
وانا كنت امبارح خالي
واليوم دا
صبحت عليل
عطشان ودوايا حبيبي
يسقيني العشق دليل
ودليل الحب .. عمايل
وكلام الحب جميل
وانا كل ما أقول التوبه
تغويني .. المواويل
تطرح في القلب جناين
تفقس فيها الزغاليل
عشاق يا حمام الغيه
ولا فيش قدامنا بديل
سكه ومحسوبه علينا
نمشيها
جيل ورا جيل
ع الشوك
نفرد خطاوينا
في الليل
تضوي القناديل
حوالينا قلوب حبابه
ومعانا العقل دليل
والشمس تصب صبابه
والمنبع
نهر النيل
وان لاموا علينا
يلوموا
ما لهمش علينا سبيل
ما هو شوك العشق
ملامه
والشوك
في الورد أصيل
ودوني ع السبيل
ودوني ع السبيل
الشاعر
الأكره
أنا الأديب لما أتكلم ما باخليشى
لأني جاهل
وفاجومي
ومخ مفيشي
وأي تغيير في حياتي
ميتعبنيشي
وأنا اللي قولي على نويى
مش من بره
وأبدأ كلامي عن الأشعار
واللي زانوها
بيرم وخيرى
وكل الناس اللي صانوها
أما الكلاب عند الجواسيس
واللي خانوها
فدول كلاب
وما مبنذكروش هنا بالمره
الله الله يابدوي
هنا بالمره
***
ياعم بيرم وحياتك
واللي أماتك
وخلا الناس مآبين
عايشيين على مقالاتك
وواد مباحث يتطاول
على مقاماتك
لاجعل الشعرا الأندال
مسخه وعبره
الله الله يابدوى
هنا بالمرة
***
فى كل مولد ياشويعر
لفلفت حزام
ورقصت تبع المزيكة
وكنست مقام
وصاحبت كل الألاتية
ومشيت خدام
لكل عالمة وشبشبها
حسب الأجرة
***
حرباية يابن الحرامية
مية المية
على كل لون جاهز تركب
ع التسقية
أما انت مالح ومزبط
وابن غبية
وحصانك اللي راهنت عليه
يخسر بكره
الله الله يابدوى
يخسر بكره
***
الطبل غير الشعر يا واد
ماتهبلشي
وأى شخص يكون شاعر
مايطبلشي
ياتقول كلامك جواك
يا متقبلشي
ملعون ابوك طالع نازل
شاعر أكره
هلال
العيد
في نورك يا هلال العيد
يطير بينا سفين عوام
على الأحلام يودينا
نمد جسور
نعدي بحور مغطية
في مركب نور
عليه الحور مراكبية
قلوعه من نسيج الشوق
يهب الريح
ياخدها لفوق
و دفه من امانينا
بغير ملاح
تغوط في الغريق بينا
عشان نرتاح
نلاقي الموجه لجاجه
و لا نرتاح ولا حاجة
نعود بالحيرة و نعدي
بحور بالحزن مواجه
و ييجي العيد
هلاله جديد
يلاقي الناس حزين و سعيد
حسب شوقه يجود و يزيد
و يحرم ناس على كيفه
يولع للسعيد شمعه
و يرمي البسمة و الدمعه
حسب شوقه
و على كيفه
و نورك يا هلال العيد
يطير بينا سفين عوام
على الأحلام يودينا
نيكسون
جاء
أب ت ث جح
ألف باء
جونسون روح
نيكسون جاء
قولوا هأوأو
أو قولوا هاء
على صحافتنا
الغير غراء
ذات صباح
يا فتاح
بالجرانين على ريق النوم
جم على سهوه
كبسوا القهوه
وابتدأوا ف تضييع اليوم
إللي يقول النصر نميس
ينفع تاكسي
ويمشي رميس
وإللي يقول الفورد يا بيه
أجعص من أجعصها جعيص
وإللي يقول جونسون دا حمار
راجل
عقله عقل صغار
راجل تيس
من غير حيث
ينصب ألف جنازه بطار
بس اهو ارح
وحنرتاح
وحنتبحبح بقي ونقول
يخرب بيته
ويدلق زيته
ويعيش نيكسون لنا
على طول
نيكسون عال
ومش بطال
وإللي يقول غير كده
مقفول
شفت كلامه
إلا كلامه
صح كلام راجل مسئول
ولا عنيه
يا ختي عليه
فيهم سكس ماهوش معقول
وإللي يقول يا بقر يا شراكسه
نيكسون ماله ومال النكسه
وإللي يقول بلوتنا كبيره
وإللي يقول فضوها سيره
وإللي يقول مين مسئول
وإللي يقول
وإللي يقول
شوفوا بقي يعني
ما تفلقونيش
آدى صحافتنا
وغيرها ما فيش
مش عاجباكو ما تلومونيش
قولوا هأو أو
أو قولوا هاء
على صحافتنا
الغير غراء
الانتخابات
شوف عندك يا سلاملم
واتفرج يا سلام
ع المدعو دومه عيسوي
وزير الإمن عام
فى الفصل الانتخابي
من مرسح السلام
سارح بالبلطجية
والهجامه القدام
عشان ضمان عبوره
من دايرة لانتقام
واتفرج يا سلاملم
على عيسوي يا سلام
- العيسوي بيه
- العيسوي بيه
- صاحب البوكسات
- العيسوي بيه
- والحبسخناتات
-العيسوي بيه
- ملك اللومانات
- العيسوي بيه
- والمعتقلات
- العيسوي بيه
- بشرى لجميع الهباشه
العيسوي
رمز الطفاشه
سبحان الله
من أومباشه
حكم المأمور يا ماشالله عليه
- العيسوي بيه
- العيسوي بيه
بشرى لجميع الحشاشه
العيسوي بيه
رمز الماشه
سبحان الله من أومباشه
بقي كل الإمن العام فى إديه
- العيسوي بيه
- العيسوي بيه
من أجل ضمان الحرية
لجميع تجار الباطنية
العيسوي بيه ميه الميه
حيخلي القرش
بربع جنيه
- العيسوي بيه
-العيسوي بيه
-خليكوا فاكرين
- العيسوي بيه
-تنتخبوا مين
- العيسوي بيه
- فليحيا أمين
- العيسوي بيه
- ابن أم أمين
-العيسوي بيه
- العيسوي بيه
- العيسوي بيه
كلمتين
لمصر
كل عين
تعشق حليوة
وإنتي حلوه ف كل عين
يا حبيبتي
قلبي عاشق
واسمحي لي
بكلمتين
كلمتين يا مصر يمكن
هما آخر كلمتين
حد ضامن
يمشي آمن
أو مآمن يمشي فين ؟
شابه يا أم الشعر ليلي
والجبين شق النهار
والعيون
بحرين أماني
والخدود
عسل ونار
واللوايي فى إبتسامتك
يحكوا أسرار المحار
يا للي ساكنه القصر عالي
إمتى يهنا لي المزار
كلمتين يا صبيه
طال على الانتظار
كلمتين يا مصر يمكن
هما آخر كلمتين
حد ضامن
يمشي آمن
أو مآمن يمشي فين
قصرك المسحور غيلانه
أغبي من دود الغيطان
بعد مص الغصن لاخضر
ينحتوا عضم العيدان
وإللى خلا الارض خضرا
وإللى خلا الدار أمان
عاش بجوعه ملو جوفه
مات بخوفه م الغيلان
روح الغلبان ما قالشي
عن شقا العمر إللى كان
كلمتين لمصر يبقوا
هما آخر كلمتين
حد ضامن يمشي آمن
أو مآمن يمشي فين
آدي كلمه من عذابي قلتها لك
باقي كلمه
من حنيني صنتها لك
فى الضلوع من دنيا ظالمه
كنت خايف يلمحوها
يقتلوها ف سكه ضلمه
شقشقت والنور بشاير
زهرة الصبار يا سلمى
يا نسيم الشوق يا طاير
خد لمصر الصبح كلمه
طول ما يبقي الركب ساير
بالبصاير والعنين
يبقي ضامن
يمشي آمن
يبقي شايف
يمشي فين
السيما
شوف عندك يا سلاملم
واتفرج يا سلام
أفلام القرع كوسه
حتقدم فيلم خام
من مخرج الروايح
ومسبب الزكام
عن قصه واقعية
من تشخيص المدام
والفيلم لجل خاطرك
واخد مليون وسام
واتفرج يا سلاملم
ع السيما يا سلام
الناس ملهية وساكتة
والصاله بتشغى عيون
والفيلم مطلع ريحه
والناس مش لاقيه لمون
عيل فرحان بشبابه
ومغرق شعره صابون
مشكلته .. ما بيخلفشى
ومراته كمان بتخون
ودلال بتحب عطيه
وعطيه جدع مجنون
لازق ف زبيده التشه
أخت الأستاذ مأمون
اللي مراته ام قداره
أخت محمد سعدون
جوز تانت ماريكا الهبله
اللي مرافقه المأذون
واللي معلق نبويه
بنت الأستاذ مأمون
جائزة
نوبل
شوف عندك
يا سلاملم
واتفرج يا سلام
مواطن
شخص عادي
مالوش أي اهتمام
ومبارك الخيانه
ومسميها السلام
وف يوم قرا الجرايد
تاريخ ما اعرفش كام
من يومها يا ضنايا
بيشقلب فى الكلام
واتفرج يا سلاملم
على شقلب يا سلام
لما محانم جيبن يا دخ
زايجة لوبن
يعنى مناحم بيجن
ياخد جايزة نوبل
تبقى النوديا
يعنى الدنيا
ماشيه بتحدف بالمندار
يبقى الشهر اتناشر ساعه
يبقي اليوم
ليلتين ونهار
يبقى القاتل
شخص ضحية
والمقتول مجرم جبار
شفتوا إزاى ؟
أما صحيح الطب اتقدم
وحنا ما وصلتناش أخبار
أيوه يالجنة لوبن بيه
قاعدة ازاى بتلجنى إيه
أنا مش فاهم حاجه صراحه
لما القاتل يا خد جايزه
كده من دون تلبيخ وأباحه
يبقي
يا إما اللجنه دى بايظه
أو لا مؤاخذه
رئيسها حمار
يبقي يا لجنه يا عره يا كوسه
جتنا وجتكو ستين حوسه
يبقي ف هذا الزمن المايل
ياما حتجري علينا هوايل
تبقي اللكلمه بدل الكلمة
والكاتب يمسك منشار
يبقي الراعش
يعنى الشاعر
يسكن شقه ف بيت
فى قصيده
يكتب فول
ياكل أشعار
سلام
مربع
أول
كلامنا وفتح الباب
سلام مربع
للطلاب
يا فرحه هلت وأحنا حزانى
يا ميت حلاوه عليك يا شباب
خمس سنين فاتت
على نار
كرامه " يوك "
وعيشه مرار
ولما حانت ساعه التار
راجعين يقولوا
ضباب وهباب
لكن يامصر خلاص ما بقاش
بكش
يعيش فيكي وبكاش
طول ما الشباب فاكر
ما نساش
والثوره بتدق الابواب
الغربة
يا غربة
روحي روحي
لاتحطي على سطوحي
وسطوحي يطلع فدان
والفدان يحتاج مروى
والمروى عرق الإنسان
والانسان
يحتاج ثروة
والثروة فى غيط الفلاح
والعامل صاحب المفتاح
والمفتاح يفتح جنه
والجنة فيها الحنه
يا حنه يا محنيه
عشقوكي الجناينية
زرعوكي خضرا خضرا
م البدره للقطفيه
وعجنوكي حمرا حمرا
للسمرا والخمريه
والسمرا طرحت بستان
والبستان لابس فستان
والفستان طاقة طاقة
أحمر أخضر يا رفاقه
ورفاقي يا كل الناس
من كل الناس و الاجناس
ع الجنة واقفين حراس
والحنه على سطوحي
يا غربه روحي
روحي
جنوب
لبنان
إلى
الخضرة ...
عيون الأهل والأوطان
وعفوا
عن سبب جهلي
تمام الإسم والعنوان
وعفوا
كوني أتشرف
باني اليوم اراسلكم
ولا أنزل منازلكم
أنا إنسان بسيط
مجهول
ماليش في الهيئه شان وكيان
لانا دكتور من الجامعه
ولا شاعر
ولا فنان
ولا محسوب من المحاسيب
ولا باتحط في الإعلان
ولا عالم
ولا عالمه
بتطلع صوري في الجرنان
أدينا في العذاب صحبه
وفوق نفس الطريق
سايرين
ومهما تبعد الصحبه
أكيد واصلين
ومتقابلين
أخويا زناتي
كان منكم
ويتكلم كتير عنكم
حكى لنا زمان
" وكان موجود "
عن الزعتر
وعن مسعود
وعن سلمان
وعن سلمي
حكاوي تشيب المولود
وعن عبله
وعبير الورد
وعن عنتر
هزيل العود
وعن إنسان
يبات إنسان
ويصبح في الصباح
طوربيد
زناتي يجز على نابه
وهو بيحكي لصحابه
ولاد الكلب دول يا ولاد
مناظر
إنما أوغاد
نهار مالمو لمتهم
برمتهم
ورمتهم
وعبوا الغدر ف سلاحهم
وسنوا سنان خيانتهم
نهارها الجو كان إسود
سواد بصفار
وجوف الأرض بيطلع
خراب ودمار
وكان يوم القيامه صحيح
على الأطفال
وع المجاريح
وكان برضك نهار أغبر
على الأندال
وعكس الريح
لأن الشهدا م الثوار
لاولوا الضهر
والأدبار
ولا خانوا الحمي والدار
عاشوا كبار
وماتوا كبار
وفوق الخد بسمتهم
دي الحاجه إللي كادتهم
ويسكت لحظة يتأمل
ويرجع تاني ويكمل
ولاد الكلب آخ منهم
يبيعوا بالدولار دينهم
ولاد الكلاب آخ منهم
حييجي اليوم وأحاكمهم
وراح مسكين
فىذات مره
ما نالش مرامه بالمره
زناتي الباقيه في حياتكم
خدوه لارناكا
مات بره
خدوه ازاي
ومات ازاي
أهم قالوا انه كان رايح
يدافع عن شرف بلده
زناتي
إللي اتولد مظلوم
وعاش محروم هنا ف بلده
خدوه قبرص عشان رايح
يدافع عن شرف بلده
ومهما نقول
ومهما نعيد
حنفتل
والسلب حيزيد
خلاصة القول ومعنى القصه والموال
سلامى للجميع واجب
نسا ورجال
خنادقكم
بنادقكم
وبرضه عشمنا فى الأتي
وهلبت القريب آتي
أخوكم فى الكفاح والهم
وبكره
فى السلاح والدم
موال
فلسطيني مصري
يامه مويل
الهوي
يامه موايليا
طعن الخناجر ولا
حكم الخسيس فيا
الصبر حلم العواجز
يطرح زهور الأماني
والقهر عدى الحواجز
وأنا إللي واقف مكانى
شايف غيطان البشاير
خايف . وكانن إديا
حتى الحمام إللي طاير
ما رضيش يرفرف عليا
يامه مويل الهوي
يامه مويليا
طعن الخناجر ولا
حكم الخسيس فيا
سألت شيخ الطريقه
ما رضيش يجاوب سؤالي
ودارى عني الحقيقه
وفاتني حاير ف حالي
سألت شيخ الأطبا
دوا الجرح إللي بيا
نظر لي
نظره محبه
وقال دوايا بايديا
يامه مويل الهوي
يامه مويليا
طعن الخناجر ولا
حكم الخسيس فيا
يامصر
وإنتي الحبيبة
وإنتي اغترابي وشقايا
وإنتي الجراح الرهيبه
وإنتي إللي
عندك دوايا
علمني حبك عباره
سهله
وبسيطه
وعفيه
شرط المحبه الجسارة
شرع القلوب الوفية
يامه مويل الهوي
يامه مويليا
طعن الخناجر
ولا
حكم الخسيس فيا
الأوله
بلدي
الآوله
بلدي
والتانيه بلدي
والتالته بلدي
الآوله بلدي بسلطن جو موالي
والتانيه بلدي بقول الكلمه بالعالي
والتالته بلدي يا كنزي وعزوتي ومالي
الآوله بلدي
بسلطن جو موايى ودا الموصوف
والتانيه بلدي
بقول الكلمه بالعايى وع المكشوف
والتالته بلدي
والتالته بلدي يا كنزي وعزوتي ومالي
الآوله بلدي بسلطن جو موالي
ودا الموصوف دوا العيان
بقول الكلمه بالعالى وع المكشوف
وع المكشوف وفى المليان
والتالته بلدي يا كنزي وعزوتي ومالي
وملو الشوف أونك آن
تحدي الحد يا بلدي
ما بين الحق والبهتان
ورايتك تعلا يا بلدي
دليل عن صحه البنيان
ودا الموصوف
والأوله بلدي
والتانيه بلدي
والتالته بلدي
أصل
الحكاية .... ولد
منين أجيب ناس لمعناه الكلام عارفين
سبه الأمارة
إذا حفضوا الوداد
عارفين
شرعت من القلم رمحي
جرح قمحي
جعلت عشق الغنا زادي
وناس عارفين
يا ليل يا عين يا وطن
يا صحرا يا بساتين
يا جرحي
يا غنوتي
يا ناسي يا غايبين
موالى من غربتي أخضر
خضارة حزين
حزين كلام الغنا
والسامعين عارفين
آه يا زمان الخنا
يا ماشي بالمعكوس
فيك أى شئ ينشري
وكل شئ
بفلوس
حطيت عديم الرجا
ع الخايب المتعوس
خراب
وحاكم أغا
يا قهرة العارفين
ركب الأغا ع البلد
ركب عليها الخوف
خاين قليل التنا
جاهل
عديم الشوف
خان التراب والهوا
خنق الضمير في الجوف
وداس بنعل الوطا
ع الحق
والعارفين
مين في البلد يا بلد
كان صوته من راسه
يحسب
يكيد العدا
ويصون وداد
ناسه
دار المدار بالخبل
وسقانا من كاسه
مين تحت الأغا ينطق
يقول عارفين
يا للي قريتوا الجرايد
كله كلام مغشوش
ومركبين في الصحافه
بتوع
وليها كروش
يدوسوا زر البتاعه
ينزل كلام مطروش
حمضان في حبر المطابع
وكلنا عارفين
أصل الحكايه ولد
فارس ولا زيه
خذ من بلال ندهته
ومن النبي ضيه
وم الحسين وقفته
في محنته
وزيه
قدم شبابه فدا
والحق له عارفين
خالد
يا بن الربيع والأمل
والشمس والزينه
مين يا فتي أعملك
فعل الخريف فينا
وكبرت بره الزمان
اللي ابتلاك بينا
نايمين على وددنا
مع إننا عارفين
صالح من سكون الخرس
كروان بغنيوه
الملك لك يا فتي
يا مصري يا حليوه
رقصت نجوم الفلك
بالضي تتعانق
والشمس ويا القمر
في برجهم
عارفين
شيل الغطا يا عطا
عبد السلام قدد مين
عبد الحميد يا فتي
قطب الرجال يا حسين
داعي المروءة دعي
والعمر مش عمرين
خالد يقول صحبتي
واحنا الجميع عارفين
الله أكبر هنا
ع الباغي والجبار
طعن الفتي طعنته
خار الأغا وانهار
المجد دا ابننا
والفارس الكرار
راكب على مهرنا
والكدابين عارفين
مين يا فتي علمك
لعب العصا ع الخيل
وازاي قطفت القمر
من فوق شواشي الليل
وطبعت نجم السما
بالوشم
على زندك
الأسم : خالد
ولكن
عاشق
ولك هندك
أم الدلال علمك
طبع الأسود عندك
مين يا فتي علمك
عشق الملاح والميل
هندك يا أدهم هنا
أصلك وسلسالك
والناس يا خالد هنا
عمك
هنا
خالك
يا غنوه من قهرنا
إسمك وموالك
ويا العذاب والأمل
فى دمنا
عايشين
وليه أجيب ناس
لمعناه الكلام عارفين
وإحنا الأماره
إذا حفضوا الكتاب
عارفين
شوبش
طرزان
زغروطه للحزب الجديد
حيدمر الحزب إللي فات
ويحطم السكه الحديد
ويربط المستحللات
ويعجز المستقدرين
ويقدر المستعجزات
ويرجع الأيام سنين
ويعيد زمان المعجزات
مع إن طرزان الوليد
ذات نفس
طرزان إللي مات !!
يا
حبايبنا
يا
حبايبنا
فين .. وحشتونا
لسه فاكرينا
ولا نسيتونا
دا حنا فى الغربه
م الهوى دبنا
وأنتو فى الغربه
اوعوا تفكروا
إننا تبنا
مهما فرقونا
ولا بعدونا
يا حبايبنا
عدى
الهوي
عدى الهوي
عدى
ميل هنا وهدى
شاور برمش العين
ردوا عليه قلبين
قلبين وأنا منهم
آه م الهوى ومنهم
قلب أنكوى ولا تاب
والتاني حن وداب
وبعد صبر سنتين
طلع الهوى كداب
لا جاب ولا ودا
عدى الهوي
عدى
البتاع
يا للي
فتحت
البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه
كان مسطول !
وبعد
فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له
مش معقول
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب
لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول
على
حسب وداد جلبي
على حسب وداد جلبي
ومزاج البلديات
أبعد م الشين
واتاخر
وإجول للزين
سلامات
على حسب وداد جلبي
على صهد الآرض السمرا
أنا أبوي النيل
سواني
ممصوص
وخشن من بره
زى الطينه إلآسوانى
وألخضره ف جلبي وجلبي
دايما على طرف لساني
ولساني حصاني رماني
وتعبنى كتير وأذاني
ياما جابني
وياما وداني
من جوله فى الحكايات
على حسب وداد جلبي
على بحر النيل يا جناوي
ضليله وجلة ميه
وناسات ع يجولوا حكاوي
ع تخلي اللجمه هنيه
وشطوط مزروعه غناوي
وغيطان ألحان مرويه
وألزين يغزل مواله
من كلمه عمه وخاله
وأنا زى ناساتي ما جالوا
لفيت الجول حكايات
على حسب وداد جلبي
الممنوعات
ممنوع من السفر
ممنوع من الغنا
ممنوع من الكلام
ممنوع من إلاشتياق
ممنوع من إلاستياء
ممنوع من إلابتسام
وكل يوم فى حبك
تزيد الممنوعات
وكل يوم باحبك
أكتر من اللى فات
حبيبتي يا سفينه
متشوقه وسجينه
مخبر فى كل عقده
عسكر فى كل مينا
يمنعني لو أغير
عليكي أو أطير
إليكي واستجير
بحضنك
أو أنام
فى حجرك الوسيع
وقلبك ألربيع
أعود كما الرضيع
بحرقه الفطام
حبيبتي يا مدينه
متزوقه وحزينه
فى كل حاره حسره
وف كل قصر زينه
ممنوع من إني أصبح
بعشقك .. أو أبات
ممنوع من المناقشه
ممنوع من السكات
وكل يوم فى حبك
تزيد الممنوعات
وكل يوم باحبك
أكتر من اللى فات
صبر
أيوب
عليل وصف علته
قال له الحكيم هوه
داء الغرور فى البشر
خلا النفوس هوه
طبيب وجاي يسعفه
صابه الغرور هوه
ترك أصول حرفته
وإنساق ورا القوة
كاد العليل ينتقل
قام قال له إيه هوه
يا مسأسأ الصبر فوق الجرح من بره
الجرح يا عم
جايب دم من جوه
فين آخر الصبر يا شيخ أيوب
لآمتي الحر يبات مغلوب
إلجو ضباب
الوقت غروب
ألديب ع ألباب
ألباب موروب
الحرب الحرب الحرب
ولا غير الحرب سبيل
والضرب الضرب الضرب
على ناصيه كل ذليل
النار والعار
لعدو الدار
والموت للخاين والغدار
كان جدي كبير السن
وكان بيقوللي كلام
زى القرآن
الحق عجوز وقديم ويغر
لكن ما يموتش وله طلاب
والتار قنطار
فوق كتف الحر
والصبر فى وقت البلوى
عذاب
والعزم صديق فى الوقت المر
ولا غير العزم تلاقى صحاب
والآرض براح
وأن داسها الذل تضيق بالناس
وألخضرة تموت
ويعربد فيها البوم أجناس
ولاتبقي حياه
ولا يبقي نظام
ولا خطوه تسير بالناس قدام
ولا تعرف بكره حييجي بايه
ولاتفهم معنى لآى كلام
ونلف نلف وبرضه نقول
الحرب سجال داير على طول
والسكه أمل
وألنيه عمل
والجهد حياه
والراحه شلل
يا زنود الناس الشغاله
ملعونه الراحه ف خط النار
النصر عروسه يا رجاله
لكن ممهوره بالآصرار
التار يا عروبتنا
التار
التار فوق رقبتنا
قنطار
وخلاص الشعب الحر اختار
الحرب الحرب الحرب
وليحيا كفاح الشعب
الخالق
الناطق
ايران يا مصر زينا
كان عندهم ..
ما عندنا
الدم هو دمنا
والهم من لون همنا
تمسك ودانك من قفاك
تمسك ودانك من هنا
الخالق الناطق هناك
الناطق الخالق هنا
الارض حبلى بالربيع وبالغنى
والجو
مشحون بالقصايد والغنا
والشمس
فوق الكل تشبه شمسنا
والثروة
ملو الارض والناس والبنا
بس العصابه الامريكانى
مربعه
فوق الغلابه
والديابه مضبعه
والصحفجيه العرصجيه الاربعه
لابسين صاجات
وكل حاكم له غنا
تمسك ودانك من قفاك
تمسك ودانك من هنا
الخالق الناطق هناك
الناطق الخالق هناك
نفس البلاوي
ع الغلابه متلتله
من فقر شوف وهم خوف
نازل بلا
والقهر زاد
والسيف على رقاب العباد
والمخبرين زي الجراد
ملو الخلا
والفنانين المومسين
والفنانات
دول شغالين
تبع وزير الاعلانات
يحصل جواز
يحصل طلاق
يحصل ممات
دول مبسوطين
ومابجين طول السنه
تمسك ودانك من قفاك
تمسك ودانك من هنا
اللى حصل فيهم هناك
لازم حيحصل
عندنا
الأقوال
الماسورة
المجد للشاه
فى الاعالى
وبالناس المذله
وعلى الارض
الخراب
" شاهبور با ختيار "
من سفر ما قبل الخروج
حبيبك وصاحبك
وصاحب حبيبك
كلام كله فارغ
عديم المعانى
اذا الندل صاحبك
يصاحبك لعله
وتسمع كلام
زي كذب الاغانى
وانا اللى اشتريت الخسيس
بالخساره
وبعت الاصيل
اللى يا ما اشترانى
واول ما هبت
رياح النهايه خلعنى الخسيس
من صباعه ورماني
الشاهنشاه رضا فهلوي
من سفر الخروج
اخويا الامير
بزرميط الايرانى
وعظنى ونصحنى
وسلك ودانى
لان اللى نابه
يا حبه عنيا
ما يتيخلوش
أي كاتب اغانى
دا كان لمسه قاعد معايا
النهارده
ولابس خواتم دهب
امريكانى
صحيح الشعوب
بنت كلب ولتيمه
وممكن
تزيح العروش فى ثوانى
" واحد صاحبنا "
من سفر ما بعد الخروج
عشق
الصبايا
شوف الحكايه يا وله
شوف الحكاية
عشق الصبايا يا وله
طول معايا
منهم أسايا
وهما جرحي يا وله
وهما دوايا
زرع الوداد على غير ميعاد
بقي شغلتي
أزرع وابيع قبل الربيع من جنتي
وأحلف وإتوب وإن شا الله أدوب
فى محبتي
والصبر طيب يا هوي
صبرك معايا
حبيت سواد العين سنه
ونسيت صباحي
وغرقت فى ليل الضنى
عشطان وصاحي
ولما بان ورد الشفايف
لون جراحي
طاوعت قلبى ورحت له
والشوق ورايا
لو القي خل يبات وفي
يصبح مراعي
لاطوي المداين ع القدم
وأمشي له ساعي
وأفرد قلوعي يا وله
واركب شراعي
أنا وحبيبى فى الهوى
على هوايا
شوف الحكايه
الهلوسة
انا متاسف جداً جداً
عندي سؤال
متلخفن جداً
ايها واحد
لو يجاوبني
انا متشكر
جداً جداً
كلنا طبعا نعرف جداً
ان خمينى الجامد جداً
بعد الثورة
وكشف العورة
وقال بالصوت الواضح جداً
ان مفيش لعصابه بيجن
ولا بتروله
لما حتدن
كلنا برضك
نعرف جداً
ان خمينى الجامد جداً
اعلن هذا
قوللى لماذا
قالك ثوره شعب ايران
ملك الشعب العربى كمان
والمستقبل
غير الفايت
يعنى التار العربى البيايت
يتاخد
ابا عن جد
كلنا ايضا عارفين جداً
ان مناجم
حيص جداً
وانفحت ف رقبته قزازه
واترسمت لعصابته جنازه
واتبعتر هو واعوانه
وانخضت امريكا
عشانه
واتهزت واترعبت جداً
ودا كان هايل
جداً جداً
على حين فجأة
جداً جداً
زي الشئ التافه جداً
طلع الشاهنشاه الكورو
اتمطع جيص من زوره
انه عميل
ومغفن جداً
قال الشى التافه جداً
قصده يطمن بيجن جداً
انه بتاعه وملو دراعه
ضد خمينى
الجامد جداً
والبترول يا خدوه من سينا
والمركب ترسي ف مراسينا
واحنا اخوات
وبتوع بعضينا
وحانتمنجه جداً جداً
من غير صهيونى ما يادن
ممكن اسال
جداً جداً
يبقى الشئ التافه جداً
خاين جداً جداً جداً
ولا مهلوس
جداً جداً ؟
انا متشكر جداً جداً
باحبك
باحبك با حبك
با حبك با حبك
با حبك با حبك با حبك
يا مصر
مسايا وصباحي
أسبح بحبك
وحبك شفايا
وجراحى يا مصر
واسافر بحبك
واميل زي ميلك
وتحلا الخطاوي
فى حبك يا مصر
واحب اغترانى
فى صبحك وليلك
واحب الونس بالرفاقه
يا مصر
تنام الدموع فى العيون الهواجع
وتسهر دموعي
فى حبك يا مصر
تهون السجون
والشجون
والمواجع
ويغلا مع القهر حبك
يا مصر
ولو يحبسونى
ولو يشنقوني
ولوا فكروا بالعذاب
يبعدونى
ح اقرب واقرب
مش ممكن اهرب
وتنزل دموعي على خدودي
تشرب
تلاقى الرموش والخدود والمباسم
مراسم
وصورتك عليهم يا مصر
باحبك با حبك
با حبك يا مصر
اطلع من دوّل
اطلع من دول يابن الاباليس
اطلع من دول يابن الهرمه
تلبسوا قفاطين
تلبسوا تلاليس
انت البورمه
غير هلاهليك
يا خواجه
وهدوم دلاديلك
يا خواجه
وان شا لله تخش ف تلاجه
يا خواجه الناجه كوا الناجه
حتشيل سمسارك فى شكاره وحتطلع
واكل .. بالصرمه
نواره
نواره بنتي النهارده تبقي
بتخطي عتبه
ليوم جديد
يارب خلى
يارب حافظ
يارب بارك
يارب زيد
يارب كبر
نواره تكبر
وتبقي أكبر
فى كل عيد
لا كل جمعه
لا كل يوم
لا كل ساعه
لا كل لحظه
تنول وتخطي
وتزيد نباهه
وتزيد ملاحظه
وتخطى مصر السعيده بيهم
ويبقوا ليها
وتبقي ليهم
غيطانها جنه
وترابها حنه
والنسمه خمره
ف قزازه حمرا
والنيل نجاشي
ما فيش ما جاشي
تمللى بيجي
أخضر مليجي
دايما يوفي
دايما يكفي
كل الخلايق
يصبح صباحه
فلاحه يمشي
على شطه عايق
والدنيا صافيه
والجو رايق
ما فيش معاكسه
مافيش مضايق
ما فيش عساكر وقهر تاني
كل الاماني بقت حقائق
يارب وفق
يارب وأفق
يارب ريد
واكتب عليهم
فى كل لحظه
فرح وعيد
بسكوته بابا
حاضر يا ماما
وتقوم تدوسني
عشان تبوسني
وتنام فى حضني
وتقوم ف حضنى
وتعمل العمله
وتملا حضني
الله يجازي البعيد شيطانك
حماره كلبه
مش عيب يا ماما
كده البيحاما
مش بابا قايل
وماما قالت
من طول ما حطت
وطول ما شالت
ساعه ما تبقي الحكايه
كخه
يقولوا إا ح
قوام يا ماما ؟
بسكوته بابا
بسكوت في عينك
ما فيش معامله
بيني وما بينك
ياللا امشي قومي
حماره كلبه
باظت هدومي
ماتقومش طبعا
ولا أي حاجه
وكانه مثلا
ما حصلش حاجه
تقعد تكلضم
وتلوي بوزها
وتتجاهلني
كاني جوزها
خاصماك يا بابا
ماتكلمنيش
طظ ف عظمتك
ما يهمينش
ديتها بوسه
أو تهشيكاته
أو بسكوتايه
أو بمبونايه
حتسوقي شغل النداله طبعا
وتروحي جارّة الكلام معايا
وبوسه بابا
أديكي بوسه
سكر يا بابا
تديني بوسه
كده اصطلحنا خلاص يا بابتي ؟
كده اصطلحنا يا نوارايه
مش دي الحكايه
ولا انتي يعني
لا
يعني أيه ما تخرفيش
دي تبقي يعني
الحكايه يعنى
ملعون أبوكي
ما تاخذينيش
لو كان فى قصدك
أو ربع قصدك
أو كنتي حتي
ما تقصديش
ان انتي يعني
خاصماك يا بابا
ح تخصمني
أطلع ما فيش
أبوكي أيوه
ما كانش حاجه
لكنه حاول يعيش لحاجه
وجيل أبوكي
كان يعني حاجه
وجيلك انتي
حيبقي حاجه
ومصر تبقي ألنهارده حاجه
وبكره حتما
حتبقي حاجه
وأي حاجه
وماتكونيش حاجه
إلا وسببها
فى الاصل حاجه
وبكره لمن
قمر كو يطلع
والشمس تسطع
فوق كل حاجه
حتقولوا
كان فى المكان دا ناس
فيهم طيابه
فيهم حماس
وفى الحماس
بعضش عباطه
وكانوا اخر الامر
ناس
وكان زمانهم سجون
وكانوا
مابين سجونه وامريكانه
وبين ضباب الطريق حياري
ما حد قادر يشوف مكان
حتقولوا كانوا
وياما كانوا
وياما كانوا
وياما شربوا
وياما عانوا
وياما جالهم
وياما جيلهم دفع
وكان التمن أمانه
ويا ما ناس فى المسيره
مشيت
وناس ف نص المسيره خانوا
حتقولوا كانوا
لكن يبقي فى الامر حاجه
ان اللى عربد
ما سابش حاجه
وساب كلابه
على كل حاجه
تهبش وتنهش
فى كل حاجه
ما قدرش يقتل فى أي حاجه
روح التفاؤل
بكل حاجه
سلام
للأرض
سلام يا ارضنا
يا غيطان الفلاحين
يا ورشه الصنايعي
يا بحور الصيادين
يا مدرسه يا جامعه
سلام والدنيا سامعه
يا دشمه يا خنادق
يا مدفع يا بنادق
واقفين والعزم صادق
تردوا المعتدين
ع الحق والسلام
سلام سلام سلام
سلام يا إدين قويه
خشنين وعرقانين
يناموا المغربيه
ويقوموا مبدرين
ويخضروا الجناين
ويطيروا الحمام
ويعمروا المداين
ويضيعوا فى الزحام
سلام يحمي الحياه
وصناع الحياه
ويزيد الانتباه
فى الناس الطيبن
للحق والسلام
سلام سلام سلام
سلام يا ارضينا
يا جنات الزيتون
يا اغلى عندنا
من حبات العيون
سلام نحميه بروحنا
ونصونه فى القلوب
ونداوي بيه جروحنا
احنا
وكل الشعوب
سلام يطرح امانى
ويزوق الاغانى
ويروق الانانى
ويسقى العطشانين
للعدل والسلام
سلام سلام سلام
الشربة
العجيبة
البلى بم بم
والبلى باه
قال لك ايه
قال لك اه
شربه عجيبه
من تركيبه
بلدي
يا بلد البلي بلي باه
قال لك ايه
قال لك اه
شوف يا موطن
شوف يا امير
واسبق شوفك بالتفكير
ناس بيقولوا السر ف بير
ادى البير
وادى غطاه
والبلى بم بم
والبلى باه
قال لك ايه
قال لك اه
قال لك
اكل الفول بيقوت
قال بيقوت
قال لك
حشو المعده يموت
قال لك
صهين
قال لك فوت
كل دا كدب
الناس كا شفاه
زى ما كشفوا
البلى بلى باه
قال لك ايه
قال لك اه
أي مواطن يا ولداه
زاده الفول
لازم تلقاه
عندهالبنكرياس
بطال
والامساق
فوق الاسهال
عنده الرهقة
عنده الدوخة
عنده انيميا
عنده عيال
قال لك
ثم الجهل مصيبه
مولف ويا العيا
تركيبه
تشرب منها
تعطش تانى
تشرب
تعطش
تشرب تاني
تعطش تشرب
خمسه ف سته
ميه نار
لو طالت جته
لازم تلحس
اثمن حته
يعني المخ يا خلق الله
ادي البير
وادي غطاه
والبلي بم بم
والبلي باه
قال لك ايه
قال لك اه
قال لك تصبر ع
المكتوب
زي ما صبر النبي ايوب
يعني
تسلم للميكروب
يا خد رزقه
بفضل الله
يفضل ينحل وبرك لما
تتفر فط من وسط اللمه
خايخ نخب السوس في عضاك
خلا قوايمك
ما هي شايلاك
ويعالجوك الناس بالصبر
مع انك عيان بالصبر
قومك صبر
ونومك صبر
لحد القبر ياحول الله
وحياتك من الدار للنار
تتولف عند العطار
يسقيك الحكمه ف اشعار
ويركب م الصبر دواه
وتقربع
والداء عمال
ف عضام الابعد نحال
وتخلف للبؤس عيال
وبهيه صيبه يا ولداه
ادي البير
وادي غطاه
والبلى بم بم
والبلي باه
قال لك ايه
قال لك اه
بعد الكشف
بميكرسكوب
شفنا التوب
وما تحت التوب
تشكيله امراض عشناها
واليكم فى الاتي
دواها
وصفه عجيبه من تركيبه
بلدى
يا بلدى البلى بلي باه
قال لك ايه
قال لك اه
وجع
الراس ح نعالجه بايه
قال لك تدى الناس القوت
قال لك طب والجهل يا بيه
قال لك سيب الكلمه تفوت
طب والكلمه تفوت ازاي
قال لك لما الضلمه تموت
طب والضلمه تموت ازاي
قال لك لازم بالبنوت
والنبوت حنجيبه منين
قال لك لما نهز التوت
قال لك قدر خفنا نهز
قالك
نشرب صبغة يوت
ح تطهر ايوب من صبره
وتفجر كيد المكبوت
وتفوق يونس من نومته
ويفلفص
من بطن الحوت
ادي البير
وادي غطاة
وادي وجعنا
وادي دواه
والبلي بم بم
والبلي باه
قال لك ايه
قال لك اه
عم
السيد
- عم السيد
- سيد ليه ؟
- كل ما يمشي يلقى جنيه
- يعمل ايه
- زي البرق يدوسه فى جيبه
- طب ما يجيبه وياخد بيه
- ياخد أيه
- ننقش له الورد ف منديله
- ودا بيشم
- نعصر له الورد ونسقي له
- شرب السم
- طب احسن حاجه نغنى له
- ترا لرا لم
- فرخه خالتى مباركه
- ما لها
- فيها الخير و البركه
- ليه
- تزمط كل ادان
- ايه
- بيضه ورا اللقان
- هيييه
- خالتى مباركه تاخدها
- هييه
- وتطير على الدكان
- ليه
- تقضي المونه والكمونه
- والينسونه و الدخان
- نعمه جزيله يا حاجه مباركه
- فرخه فيها الخير البركه
تذكرة
مسجون
الاسم : صابر
التهمه : مصري
السن : اجهل اهل عصري
لرغم انسدال الشيب ضفاير
من شوشتى
لما لتحت خضري
المهنه : وارث
عن جدودي
والزمان
صنع الحضاره
والنضاره
والامان
البشره : قمحى
القد : رمحى
الشعر : اخشن م الدريس
لون العيون : اسود غطيس
الانف : نافر كا لحصان
الفم : ثابت فى المكان
واما جيت ازحزحه
عن مطرحه
كان اللى كان
جهه الميلاد: فى أي اوضه مضلمه
تحت السما
على ارض مصر
من أي دار وسط
النخيل
مطرح ما يجري النيل
ما دام ما يكونش قصر
الحكم: من سبع تلاف سنه
وانا راقد سجين
اطحن على ضراسي الحجر
من الضجر
وابات حزين
الاسباب : سالنى سائل
حبستك طالت
وليه
ولانى طيب
وابن نكته
ما فيش مخالفه ركبتها
ضد القانون
لانى خايف
والقانون سيفه ف اديه
تسأل عليّ المخبرين
فى أي حين
تسمع وتفهم قصتي
الف وبيه
الاسم
صابر ع البلا
ايوب حمار
شيل الحمول من قسمتى
والانتظار
اغرق فى انهار العرق
طول النهار
والم همى فى المسا
وارقد عليه
عرفت ليه ؟
الطنبور
الكلمات
زهر الجناحين طرح
والعطر مش واحد
مع ان اصل الشجر
طالع فى غيط واحد
والحب لما انبدر
مسقى بماء واحد
عجبي علىفرعين
كان اصلهم واحد
واحد غرز فى الطين
واللى سرح .. واحد
والورد لما انقطف
يا رب يا واحد
ريحت بيه الوفات
واللى تعب .. واحد
بسيطه جاوي جاوى
روايه المجاله
مليحه جاوى جاوى
للى ما نايمشى
طويله جاوى جاوى
حكايه الرساله
جريبه جاوى جاوى
وانت ماعالمشى
مد الخطوة وامشى
تلجى الصعب فات
غير الله ما دامشى
وكل حى مات
وان كنت ناصح وفهمت المجاله
فهمها يابنى للى ما فاهمشى
بسيطه
كيف الدنيا لف ودور
ياطنبور
هم شويه
خلى الميه تغطى البور
معدودة الخطاوي
رايحه ولا جايه
ما يلمكش خوفك
ع الدنيا الدينه
جول الكلمه عالي
بالصوت البلالى
جول ان العداله
دين الانسانيه
كامش ليه وخايف
فرج الشفايف
هو العمر واحد
ولا العمر ميه ؟
وان كنت ناصح
وفهمت المجاله
فهمها يا بنيى للى ما فاهمشي
بسيطه
كيف الدنيا لف ودور
يا طنبور
هم شويه
خلى الميه تغطى البور
المولى خالجنا بالعدل وناشينا
طل ف خلجه
تلجاة
بالعجل مساوينا
ومنور طريجنا من فضله وهادينا
بالنور اللى طالل
من غرة نبينا
جن الليل غوانا
ومشينا فى عمانا
ونسينا شارعنا
وتهنا فى المدينة
وان كنت ناصح
وفهمت المجاله
فهمها يا بنى للى ما فاهمشى
بسيطه
كيف الدنيا لف ودور
ياطنبور
هم شويه خلى الميه
تغطى البور
يا مودر شبابك
بسنين العذاب
بين وهم الامانى
والصبر اللى شاب
صبرك ع المساوي
بيزيد البلاوي
وتبجى انت المصيبه
وتبجى انت المصاب
يا ويلك بصبرك
ع الظالم وظلمه
فى الدنيا وياويلك
من يوم الحساب
وان كنت ناصح وفهمت المجاله
فهمها يا بنى للى ما فا همشي
بسيطه
كيف الدنيا لف ودور
ياطنبور
هم شويه
خلى الميه تغطى البور
الصمت
سكات سكات سكات
حواديت ورا السكات
مليان كلام لكنى
اخرس من السكات
سكات سكات سكات
مات الكلام وبات
جدار لالف دار
يبادلوني السكات
سكات
سكات
سكات
لكن لسكاتنا معنى
انطلق من الكلام
وكل من سمعنا
يفهمنا بالتمام
وحق من جمعنا
لينطق الكلام
ويقول الصمت مات
ويصرخ فى السكات
سكات
سكات
فزورة
شوف عندك يا سلاملم
اتفرج يا سلام
فزوره قرعاويه
من انتاج النظام
سمك لبن طماطم
بصل عسل سخام
فاعتبروا صاحبنا هديه
للاوساط القرعيه
هيلا بيلا وشيله ويا للا
لفعوا البقال اسم الله
على مجلس انس الشله
بقي ريس فرقه كبير
واحد بقال تموين
تفتكروا دا يطلع مين ؟
يساوى حزب حاكم
واخر انسجام
ولسه نشوف طلاسم
مادام الوعى نام
واتفرج يا سلاملم
وافهمها يا سلام
واحد بقال تموين
كان مطرح طه حسين!
وكمان مرضيش بالمطرح
تفتكروا يروح فين
كان قال فى الجامعه مدير
على درجه نص وزير
اظهر فى القرع مواهب
اكبر من سنه كتير
ولان الشله اياها
مواهبها
ما هيش وياها
شوف عندك يا سلاملم
واتفرج يا سلام
هزليه مرسحيه
على تياتروا السلام
سلام كلام اغانى
وعليكم السلام
ما عاد على الغلابه
عايد... غير الكلام
والحاله كل مادا
ياسادة ياكرام
اتفرج يا سلاملم
ع المسرح يا سلام
سالمه يا سلامه
كوكاكولا جت بالسلامه
سالمه ياسلامه
ايا سلالمه يا سلامه
نشروا الاعلان
ملو الجرنان
جوه البراويز الدهبيه
والتليفزيون
بالصوت واللون
كوكاكولا هى الاصليه
اشرب يا خفيف
بطل تخاريف
بلا طيظ الطور
بلا وطنيه
كوكاكولا تفوق
وتروق
ضد الافكار الهدامه
سالمه يا سلامه
وداليدا رجعت بسلامه
ايا سالمه يا سلامه
مصريه ومن مواليد شبرا
من تحت نفقها ومجاريها
لو كانوا ما حرقوش الاوبرا
كانت حتنور لياليها
بالغنوة المدهونه شفايف
غرقانه وسايحه ف بلاويها
سيد درويش اللى حيلتنا
سرقوة
وباعوه بيعه ندامه
سالمه يا سلامه
طيري بينا ورفرفي ياحمامه
سالمه يا سلامه
على مصر التانية ام علامه
ولاده وحبلى وبكريه
غصبن عن عين اللى خانوها
لا اتغير لونها
ولا اوانها
ولا تنسي لسانها
ودار ابوها
تحبل مواويل
من فيض النيل
وتخلى ولادها يغنوها
تسرح غناويها ف حواريها
على نغمه بكرة البسامه
وسالمه يا سلامه
تولد وتقوم بالسلامه
مناعه ارزاق
جلابة ارزاء
يا سخامه يا لطامه
ياللى اسمك اخلاق
ازيك وايش حالك
ايه اخر الانباء
دجوكى ؟
سلخوكى ؟
خلوكى اشلاء
ما انا قايل وسمعتي
بس انتي اللى طمعتى
فى بلدنا يعوزكي
مسكوكي دقوكي
بدماغ الدقماق
بالقاضيه الفنيه
صرعوكى السجانه
حبوسكى
فى قضيه
مرفوضه وخسرانه
والتهمه الجنائيه
اكمنك انسانه
وخدوكى الشرطيه
وعساكر هجانه
وابولكنه فرنساوي
طبال ومغناوي
بيغنى اشتراكاوى
والعالم طرشانه
وابو عسكر حرميه
بيبرطع فى تكيه
ويقول اشتركيه
والناس
لسه جعانه
يا هبيله يا فضيله
يابتاعه المهابيل
بلا وكسه
بلانيله
بلا هفه مخاليل
دى بلدنا
ولا حولا
ما بقاش فيها علاوله
وعوضنا على المولي
فى ولادنا الشماليل
يادينا ورجلينا
اسسنا وعلينا
وعملنا اللى علينا
جيل يطلع ورا جيل
ويقول ابنوا لبكره
والبنى ادم ذكري
نتحمس للفكرة
من كتر التطبيل
واخيرا ولا اخر
اخلاقنا بتتاجر
ومهازل
ومساخر
وهزيمه
وتضليل
رساله رقم 1
كل ما تهل البشاير
من يناير كل عام
يدخل النور الزنازن
يطرد الخوف
والظلام
يا نسيم السجن ميل
ع الشجر وارمي السلام
زهر النوار
وعشش فى الزنازين .. الحمام
من سكون السجن
صوتي
نبض قلبي
من تابوتي
بيقولولك يا حبيبتي
كلمتي
من بطن حوتي
سلمى لي ع الحبايب
يا حبيبتي
سلمى لي
كل حب
وله نصيبه من سلامي
بلغي لي
احضنى العالم عشاني
بين عيونك
وابعتى لي
نظره
منها اشوف حبايبي
واشفي قلبي
واساليلي
كل عالم فى بلدنا
كل برج وكل مادنة
كل صاحب من صحابنا
كل عيل من ولادنا
حد فيهم شاف علامه
من علامات القيامه
قبل ما تهل البشاير
يوم تمنتاشر يناير
لما قامت مصر قومه
بعد ما ظنوها
نومه
تلعن الجوع والمذله
والمظالم
والحكومه ؟
سلمى لي ع الولاد السمر
خضر العمر
فى عموم الحواري
سلمي لي ع البنات
المخطوبين فى المهد
لسرير الجواري
واساليلي بالعتاب
كل قاري فى الكتاب
حد فيهم
كان يصدق
بعد جهل
بعد موت
ان حس الشعب يسبق
واي صوت
هى دي مصر العظيمه
ياحبيبتي
هى مصر
اللي فضلتى ف هواها
عشنا
على الف قصر
هى دي يا عزة
مصر
صرخة جيفارا
جيفارا مات
جيفارا مات
اخر خبر فى الراديوهات
وفى الكنايس
والجوامع
وفى الحواري
والشوارع
وع القهاوي وع البارات
جيفارا مات
واتمد حبل الدردشه
والتعليقات
مات المناضل المثال
ياميت خسارة على الرجال
مات الجدع فوق مدفعة جوه الغابات
جسد نضالة بمصرعه
ومن سكات
لا طبالين يفرقعوا
ولا اعلانات
ما رايكم دام عزكم
ياانتيكات
يا غرقانين فى المأكولات
والملبوسات
يا دافيانين
ومولعين الدفايات
يا محفلطين يا ملمعين
ياجيمسنات
يا بتوع نضال اخر زمن
فى العوامات
ما رايكم دام عزكم
جيفارا مات
لاطنطنة
ولا شنشنه
ولا اعلامات واستعلامات
**
عينى عليه ساعه القضا
من غير رفاقه تودعه
يطلع انينه للفضا
يزعق
ولا مين يسمعه
يمكن صرخ من الالم
من لسعه النار ف الحشا
يمكن ضحك
او ابتسم
او ارتعش
او انتشى
يمكن لفظ اخر نفس
كلمه وادع
لجل الجياع
يمكن وصيه
للى حاضنين القضيه
فى الصراع
صور كتير
ملو الخيال
والف مليون احتمال
لكن اكيد
اكيد اكيد
ولاجدال
جيفارا مات
موتة رجال
ياشغالين ومحرومين
يا مسلسلين رجلين وراس
خلاص خلاص
مالكوش خلاص
غير بالبنادق والرصاص
دا منطق العصر السعيد
عصر الزنوج والامريكان
الكلمه للنار والحديد
والعدل اخرس او جبان
صرخه جيفار يا عبيد
في اى موطن او مكان
مافيش بديل
مافيش مناص
يا تجهزوا جيش الخلاص
يا تقولوا على العالم خلاص
باستنظرك
باستنظرك
رغم القساوة
ف منظرك
لحظة هروبك يا رباب
م الجب لما استنصرك
باستنظرك
باستنظرك
باستنظرك
رغم الشتا
والبرد والرعد المخيف
باستنظرك
ف الشارع المشغول
باوحال الرصيف
أنا اصلي حاسب موعدك
وعارف اللي بيبعدك
وأنا اللي خابر
تبقي مين
وأنا اللي صابر
من سنين
وباعدّ لك
مطرح ف بستان الامل
وبامدّ لك
وف كل خطوة
أمدّ لك ايدي اللي شققها العمل
مدي الخطاوي يا حبيبيتي
وقدّمي
وان كنتي خايفه م الطريق
اتبسمي
يا شمس ياللي ضحكتك
قمر ينور سكتك
أنا اللي عشقك
عزّني
وانتي اللي عشقي
يستتك
باستنظرك
يا جرحي يا حلمي العنيد
باستنظرك
يا مصر يا حبي الوحيد
وحتيجي يوم وتصدّقي
عشقي الأصيل وتحققي
حلمي الجميل وتزوقي
عمري اللي ضاع
مستنظرك
باستنظرك
باستنظرك
الحاوي
توت
حاوي حاوي توت
خش اتفرج هرج فوت
زاحم لاحم عارك اضرب
ناضل فاضل
خطوة وتقرب
وإلحق نفسك
قبل ما يلعب
وامسك نفسك جوه الملعب
دانت حتضحك لما تموت
توت حاوي
حاوي توت
***
توت حاوي سبع مرات
لعبة جديدة
يا حضرات
دق الفول ويا الكرات
هات الشطه والبهرات
شخبط لخبط حضر طاسه وكب الزيت
ولع طلع ريحه مريحه ف جو البيت
ح تلقى عجينه عجيبة متينة
لا تقول تينه ولا برتينه
كل يا صنايعي
كل يا فقير
كل ماهو لسه الفول قناطير
آه يا سلام لو عود جرجير
تفضل تاكل لما تموت
توت حاوي
حاوي توت
***
توت حاوي حاوي توت
خش اتفرج هرج فوت
قعده فكيهه
حتسمع فيها
حكاية البيضة والكتكوت
يحكى أن
ولازم يحكى
وكان ياما كان
قبل الجنه
كان فيه بيضه وفرخه كمان
دبحوا الفرخه طبت سارخه
قامت البيضه طقت شارخه
طقشت فقست فرخ فصيح
يدن ويهلل ويصيح
حتى إن كان على وش دبيح
يفضل يدن لما يموت
توت حاوي حاوي توت
***
سحر مفيش دا كلام تهويش
نفض مخك يا ابو درويش
كل ما فيها الدنيا دي فيها
ناس بتبكش
لجل تعيش
حابس حابس
عفريت كابس
ينزل قالع يطلع لابس
واللي بيرقص
ع المسامير
واللي بإبره بيفحت بير
واللي بينفخ في المزامير
يفضل ينفخ لما يموت
توت حاوي
حاوي توت
عيون الكلام
إذا الشمس غرقت
في بحر الغمام
ومدت على الدنيا موجة ظلام
ومات البصر
في العيون والبصاير
وغاب الطريق
في الخطوط والدواير
يا ساير يا داير
يا ابو المفهومية
مفيش لك دليل
غير عيون الكلام