مجموعه صندوق الدنيا
|
|
|
العيسوي بيه |
العيسوي بيه
شوف عندك يا سلاملم
واتفرج يا سلام
ع المدعو دومه عيسوي
وزير الأمن العام
في الفصل الإنتخابي
من مرسح السلام
سارح بالبلطجيه
والهجامة القدام
عشان ضمان عبوره
من دايرة الانتقام
واتفرج يا سلاملم
ع العيسوي يا سلام
العيسوي بيه
العيسوي بيه
صاحب البوكسات
العيسوي بيه
و الحبسخناتات
العيسوي بيه
والمعتقلات
العيسوي بيه
بشرى لجميع الهباشة
العيسوي
رمز الطفاشة
سبحان الله
من اومباشه
حكم المأمور
يا ما شاء الله عليه
العيسوي بيه
العيسوي بيه
بشرى لجميع الحشاشة
العيسوي بيه
رمز الماشه
سبحان الله من اومباشه
بقى كل الأمن العام في إديه
العيسوي بيه
العيسوي بيه
من اجل ضمان الحرية
لجميع تجار الباطليه
العيسوي بيه ميه الميه
حيخلي القرش
بربع جنيه
العيسوي بيه
العيسوي بيه
خليكوا فاكرين
العيسوي بيه
تنتخبوا مين
العيسوي بيه
فليحيا امين
العيسوي بيه
ابن ام مين
العيسوس بيه
العيسوي بيه
العيسوي بيه
واحد بقال تموين
شوف عندك يا سلاملم
واتفرج يا سلام
فزور قرعاوية
من انتاج النظام
سمك لبن طماطم
بصل عسل سخام
فاعتبروا صاحبنا هديه
للاوساط القرعية
هيلا بيلا و شيله و ياللا
لفعوا البقال اسم الله
على مجلس انس الشله
بقى ريس فرقة كبير
واحد بقال تموين
تفتكروا دا يطلع مين؟؟
يساوي حزب حاكم
و آخرانسجام
و لسه نشوف طلاسم
ما دام الوعي نام
واتفرج يا سلاملم
و افهمها يا سلام
واحد بقال تموين
كان مطرح طه حسين!
و كمان ما رضيش بالمطرح
تفتكرا يروح على فين
كان قال في الجامعة مدير
على درجة نص وزير
اظهر في القرع مواهب
اكبر من سنه كتير
و لأن الشلة اياها
مواهبها
ما هيش وياها
شوف عندك يا سلاملم
و اتفرج يا سلام
هزلية مرسحية
على تيتاروا السلام
سلام كلام اغاني
وعليكم السلام
ما عادعلى الغلابة
عايد .. غير الكلام
و الحالة كل مادا
يا سادة يا كرام
اتفرج يا سلاملم
عالمسرح يا سلام
سالمة يا سلامة
كوكاكولا جت بالسلامة
سالمة يا سلامة
ايا سالمة يا سلامة
نشروا الاعلان
ملوا الجرنان
جوا البراويز الدهبية
والتيلفزيون
بالصوت و اللون
كوكاكولا هي الاصلية
اشرب يا خفيف
بطل تخاريف
بلا طيز التور
بلا وطنية
كوكاكولا تفوق
و تروق
ضد الافكارالهدامة
سالمة يا سلامة
و داليدا رجعت بسلامة
ايا سالمة يا سلامة
مصرية ومن مواليد شبرا
من تحت نفقها و مجاريها
لو كانوا ما حرقوش الاوبرا
كانت حتنور لياليها
بالغنوة المدهونة شفايف
غرقانة و سايحة ف بلاويها
سيد درويش اللي حيلتنا
سرقوه
وباعوه بيعة ندامه
سالمة يا سلامة
على مصر التانية ام علامة
ولاده و حبل و بكريه
غصبن عن عين اللي خانوها
لا اتغير لونها
و لا اوانها
و لا تنسى لسانها
و دار ابوها
تحبل مواويل
من فيض النيل
و تخلي ولادها يغنوها
تسرح غناويها ف حواريها
على نغمة بكره البسامه
و سالمه يا سلامة
تولد وتقوم بالسلامة
***---***
شوف عندك ياسلاملم
واتفرج يا سلام
على فرقة جوع و غني
سارحين وسط الزحام
عالطبلة و الربابة
و الرك عالكلام
يا شحاتين بلدنا
عددكو يجي كام
لو كل بق كلمة
حتلاقوا البر عام
و اتفرج يا سلاملم
عالفرقة يا سلام
و صلاة الله على البدر
و اللعنة نهديها طرا
للقلب الصخري الحجري
فيم الاحسان و حتاما
في قوم اكلوا اقواما
بالسحت و بالباطل عاما
وسنينا بصنوف القهر
قد فاض الكيل ايا سادة
و الجوع يعربد بزياده
و الهم لحاف و وسادة
قد كان الناس اذا شبعوا
طعموا المحروم كما طبعوا
و اليوم تراهم قد تبعوا
سبل التخزين او الحذر
ففقير القوم اذا جاعا
و جميع عزال قد باعا
لا يجد العون اذا ضاعا
بل يسمعون لوما كالصبر
و غني القوم و مولاهم
لا يمنح شئ اياهم
غير الترحيب برؤياهم
جوعى
و الجوع ابو الكفر
فيضيع الحب المكنون
و يشيع الحقد المجنون
و يذاع السر المدفون
بفضائح سكان القصر
قد قالوا سلاما فرخاءا
فالخير الى الناس تراءى
فازدادوا غلاء و ثراء
فكرهنا اقواس النصر
فالنصر اذا لم يعطينا
قوت الاطفال و يحمينا
فبماذا نفرح يا سينا
عدت
او غرت الى القبر
مقدمه صندوق الدنيا
بانورما دنيا فونيا
صندوق الدنيا عصري
الصورة من أميركا
و الصوت من جوه مصري
لو تفهم كل قصدي
اوهب لك نص قصري
واكتب لك الوصية
على جناح الحمام
و اتفرج يا سلاملم
واتفرج يا سلام
***---***
السيــــما
شوف عندك يا سلاملم
واتفرج يا سلام
افلام القرعة كوسة
حتقدم فيلم خام
من مخرج الروايح
و مسسب الزكام
عن قصة واقعية
من تشخيص المدام
والفيلم لجل خاطرك
و اخد مليون وسام
و اتفرج يا سلاملم
عالسيما يا سلام
الناس ملهية و ساكتة
و الصالة بتشغي عيون
و الفيلم مطلع ريحه
و الناس مش لاقيه لمون
عيل فرحان بشبابه
و مغرق شعره صابون
مشكلته...مابيخلفش
ومراته كمان بتخون
ودلال بتحب عطيه
وعطيه ولد مجنون
لازق فِ زبيدة التشه
أخت الأستاذ مأمون
اللي مراته ام قدارة
أخت محمد سعدون
جوز تانت ماريكا الهبلة
اللي مرافقه المأذون
واللي معلق نبويه
بنت الأستاذ مأمون
الفيلم اتعقد خلاص
جايبين له شجيع مجنون
دب خناقة ف خمارة
وشالوه عالبيت معجون
البطلة حتشرب نجده
مبروك
وصل المأذون
شوف عندك يا سلاملم
و اتفرج يا سلام
عنتر بني الشواربي
فارس ما فيش كلام
بالشنطة السامسونايت
و النضارة السيكام
يهزم جيش الضرايب
و الدولة و النظام
ويلعلع في المضاربة
و يراهن بالمدام
و اتفرج يا سلاملم
على عنترة يا سلام
سلي الجمارك و الإدارة
يا عبلة يا حتة حمارة
يا عبلة يا حتة حمارة
عن لعبة التهريب و عني
يا بنت مالك العمارة
صاحبت فيكي ألف فارس
و جبتهم لك المغارة
عملتي فيها نص فلة
و لبستي برقع الطهارة
عشان سي عبده
ذا بوي فرندك
أبو الشوارب المستعارة
يا هبلة
يا ام دماغ رومانسي
يا مأخراني في التجارة
دفعت فيكي دم قلبي
و طلعتي بيعة بالخسارة
***---***
شوف عندك يا سلاملم
و اتفرج يا سلام
على عبلة بنت مالك
عمارة السلام
دلوعة النوادي
اللي اتفطمت مدام
خيوبه في المدارس
لهلوبه بالغرام
تعشق في الثانية دستة
شوف تبقى الساعة كام
و اتفرج يا سلاملم
عبودي يا حبيبي
يا كلب يا لئيم
عشان واقفة شواربك
باغير من الحريم
وأبات اسمع داليدا
و أهيم في حب الحليم
و اعض في المخدة
و اطير مع النسيم
واكلم مامي عنك
وخالتي ام ابراهيم
يا حبك يا مغفل
و اروح فيك الجحيم
و بابي الحاج مالك
مبارك يا غشيم
و لو عنترة يبلضم
حياكل بلقديم
شوف عندك يا سلاملم
و اتفرج ياسلام
مواطن شخص عادي
مالوش أي اهتمام
و مبارك الخيانة
و مسميها السلام
وف يوم قرأ الجرايد
تاريخ ما اعرفش كام
من يومها يا ضنايا
بيشقلب في الكلام
واتفرج يا سلاملم
على شقلب يا سلام
لما محانم جايبين يا دخ
زايجة لوبن
يعني مناحم بيجن
ياخد جايزة نوبل
تبقى النوديا
يعني الدنيا
ماشية بتحدف يالمندار
يبقى الشهر اتناشر ساعة
يبقى اليوم ليلتين و نهار
يبقى القاتل شخص ضحية
و المقتول مجرم جبار شفتوا ازاي؟
اما صحيح الطب اتقدم
و حنا ما وصلتناش اخبار
ايوه يا لجنة لوبن بيه
قاعدة ازاي بتلجني ايه
انا مش فاهم حاجة صراحة
لما القاتل ياخد جايزة
كده من دون تلبيخ و اباحة
يبقى يا اما اللجنة دي بايظة
او لا مؤاخذة .. رئيسها حمار
يبقى يا لجنة يا عرة يا كوسة
جتنا و جتكو ستين حوسة
يبقى ف هذا الزمن المايل
يا ما حتجري علينا هوايل
تبقى اللكمة بدل الكلمة
و الكاتب يمسك منشار
يبقى الراعش يعني الشاعر
يسكن شقة في بيت في قصيدة
يكتب فول ياكل اشعار